Print
Hits: 3364

महाराष्ट्र टाईम्स
22 September 2012
पुणे, भारत.

शतकोत्तर महोत्सवाच्या पार्श्वभूमीवर केईएम हॉस्पिटलचे होणा-या विस्तारीकरणात पुण्यातील पहिले यकृत (लिव्हर) प्रत्यारोपण केंद्र कार्यान्वित करण्यात येणार आहे. त्याबरोबरच विविध प्रकारच्या पेशंटसाठी अतिदक्षता विभाग (आयसीयू) देखील सुरू करण्यात येणार आहेत.

नव्या इमारतीचे भूमीपूजन येत्या १४ ऑक्टोबरला केंद्रीय कृषीमंत्री शरद पवार यांच्या हस्ते होणार आहे. हॉस्पिटलच्या सध्याच्या इमारतीचा काही भाग पाडण्यात येऊन त्यासह उ‍र्वरीत जागेत इमारतीच्या विस्तारीकरणाचा प्रकल्प उभारला जाणार आहे , अशी माहिती हॉस्पिटलचे वैद्यकीय संचालक व विश्वस्त डॉ. कुरूस कोयाजी यांनी पत्रकार परिषदेत दिली. या वेळी बालरोग तज्ज्ञ डॉ. आनंद पंडीत , नेफ्रोल़ॉजिस्ट डॉ. फारुख वाडिया , डॉ. महादेव बापये , डॉ. एच. जी. मनसुखानी , वैद्यकीय अधीक्षक डॉ. विश्वनाथ येमूल उपस्थित होते.

नव्या इमारतीत सुमारे २५० खाटांची क्षमता असेल. मात्र त्यामध्ये आर्थिकदृष्ट्या महागड्या अशा स्वतंत्र खोल्यांची व्यवस्था केली जाणार आहे. शहरात सद्यस्थितीत कोणतेही ' यकृत प्रत्यारोपण केंद्र ' अस्तित्वात नाही. पेशंटला याबाबत सुविधा मिळण्यासाठी अशा प्रकारचे केंद्र तयार करण्यात येणार आहे. तसेच नवजात बालकांसह लहान मुलांसाठी प्रत्येकी २० खाटा प्रौढांसाठी ३० एवढ्या खाटांचा समावेश असलेले आयसीयू कक्षाचे विस्तारीकरण केले जाणार आहे. नवे ऑपरेशन थिएटरसह कॅन्सरच्या पेशंटसाठी रेडिएशन केंद्रही साकारले जाणार आहे , असे डॉ. कोयाजी यांनी सांगितले.

Aarogya news

हॉस्पिटलच्या सध्याच्या सहाशे खाटांच्या क्षमतेपैकी १४० खाटा या आर्थिकदृष्ट्या महागड्या आहेत. तर उर्वरीत सवलतीच्या दरात उपचार देणाऱ्या खाटांचा समावेश आहे. त्यामुळे उपचाराची सवलत देताना तो खर्च इतर वर्गाकडून काढता यावा यासाठी नव्या इमारतीत स्वतंत्र प्रशस्त खोल्या तयार केल्या जाणार आहेत. अडीचशे खाटांच्या इमारतीसाठी ५० कोटी रुपयांचा खर्च अपेक्षित असून तीन वर्षात ही इमारत सोयी सुविधांसह पूर्ण व्हावी अशी अपेक्षा आहे , असेही त्यांनी स्पष्ट केले.

Disclaimer: The news story on this page is the copyright of the cited publication. This has been reproduced here for visitors to review, comment on and discuss. This is in keeping with the principle of ’Fair dealing’ or ’Fair use’. Visitors may click on the publication name, in the news story, to visit the original article as it appears on the publication’s website.